Март 13-16 хүннеринде, Тываның В.Халилов аттыг күрүне филармониязының «Миниатюра театры» бөлүктүң артистери, С.Афанасьевтиң удуртканы, Новосибирск хоорайның драматургия театрында аалдап чеде берген. Олар боттарының сайтызында «Афанасьев театрында – Тывадан аалчылар» деп эгелиг медээни бижип турарлар. Медээде дамчытканы, бистиң эштеривис, Тываның күрүне филармониязының директору Игорь Дулуш баштаан, «миниатюра театры» бөлүктүң коллективи, дөрт хонук дургузунда аалчылар болур.

Дуржулга солчуушкуну, бир чыл бурунгаар «Аныяк режиссура» деп төлевилелге үндезилеп, удуртукчуларның дугуржулгазы-биле күүсеттинип турары бо. Тываның артистеринге, Новосибирск хоорайда билдингир, көрүкчүлерниң ынак шиилери апарган «Ханума», «Ревизор»-ну, Афанасьев театрының актерлары ойнап көргүзерлер. А, тыва артистер «Шагаа» байырлалын көргүскен көргүзүү-биле, бичии уругларга «Поиграй-ка» деп интерактивтиг оюн-көргүзүүн бараалгадыр.

Ужуражылганың түңнелинде, аныяк режиссерлар Анна Зуева, Дарья Супрунова тыва коллегаларынга мастер-класстар бээр, а театрның чурукчулары - Олеся Беселия болгаш Любовь Бойкова, арга-дуржулгазын үлежир болган.

Бо, Новосибирск хоорайже аалдаашкын, бистиң артистеривиске улуг ажык-дузалыг болур деп идегээр-дир бис.

 

15.03.2017 чыл