Июнь 10-12 хүннеринде, Тываның чазааның үрер хөгжүм оркестри Истра хоорайга, россияның үрер хөгжүм оркестрлериниң аразынга «Московия кубогу» фестивалынга Гран-при шаңналын чаалап алган. Фестиваль үш аңгы бөлүкке чардынган турган: бичи уруглар аразынга, бот-тывынгыр деңнелдиг хөгжүмчүлер аразынга база профессионал деңнелдиглер аразынга (тыва оркестр профессионал деңнелде).

Фестивальды, Москва облазының культура яамызы, Истра хоорайның администрациязы россияның алдарлыг дирижеру Валерий Халиловка тураскаадып эртирген. Ниитизи-биле 30 ажыг оркестрлер, 1000 ажыг киржикчилер киришкен. Россияның шыырак коллективтери, ол дээрге Москва, Истра хоорайлар Белгород, Калуга областардан, Тывадан база Белоруссиядан оркестрлер келген.

Мооң мурнунда россия деңнелдиг фестивальтарга, тыва оркестр каш удаа киришкеш, чүгле Белгородтуң оркестринге аштырып турган болза, бо удаада оларны бүзүрелдии-биле ашкаш, Россияның эң шыырак оркестри болган.



О.Киштеек

15.06.17ч.