Январь 7-де, Христиан шажын-биле Христос бурганның төрүттүнген хүнүде Тываның Күрүне филармониязынга Россияның кол шериг дирижеру, Россияның улустуң артизи, Тываның уран-чүүлдүң алдарлыг ажылдакчызы, генерал-лейтенант Валерий Халиловтуң база Александров аттыг Кызыл тук эдилекчизи академиктиг ыры-сам ансамблиниң артистериниң чырык адынга турааскааткан «Орук айтыкчызы сылдыстың чырыы» деп сактыышкын кежээзи эрткен. Хай-халап 2016 чылдың декабрь 25-те Кара далай кырынга болган.

Концерт эгелээр шак четпээнде зал шыгырт дола берген, филармонияның ажылдакчылары немелде олуттар салыр ужурга таварышкан. Фойеде Валерий Халиловтуң база ооң хөгжүмчү эш-өөрүнүң Тывага чоруп турганының дугайында хөй санныг фоточуруктарлыг делгелге. Чуруктарда аас-кежиктиг арыннар, тыва хөгжүмчүлер, чаш ажы-төл, тус черниң чурттакчылары-биле өөрүшкүлүг ужуражылгалар, тываның уран-чүүлү, шажын-чүдүлгези, бойдустуң каас-чаражы-биле таныжылгалар, республиканың удуртулгазы-биле ажылчын байдалгаужуражылгалар.

Валерий Михайлович Тываны, тываның чонун, культуразын сонуургап, сайзырадыр аргаларны дилеп эгелей берген турган. Сорулгалар эвээш эвес турган, харын-даа тыва хөгжүмчүлерни чүглендирип «Тыва» деп маршты безин бижип четтигипкен.

Алдарлыг Александров аттыг ансамбль делегейниң аңгы-аңгы тергиин дээн залдарынга чеди муң ажыг концерттерни кылган, оларны чээрби ажыг миллион көрүкчүлер көрген. Тывага чаңгыс эвес удаа келгеннер, чоокта чаа Кызылдың №1 школазының оюнга кээп чораанар.

2014 чылда Тывага болган «Азия төвүнге фанфарлар» деп делегей чергелиг үрер хөгжүм оркестрлериниң фестивалынга Валерий Михайлович Халилов бир дугаар келген соонда, Тываны ийи дугаар чуртум деп санай бергенин чугаалаан турган.

Кежээни тыва хөгжүм херексели игилдиң үнү база национал оркестирниң артистериниң мөргүлү-биле ажыткан.

Тываның чазааның үрер хөгжүм оркестри «Ыдыктыг дайын» деп уран-чогаалды күүсеткен.

Тыва республиканың баштыңы Шолбан Кара-оолдуң, Тываның күрүне филармониязынга ВалерийМихайлович Халиловтуң ады-биле адаан чарлыын, чазактың оралакчы даргазы Анатолий Дамба-Хуурак кежээниң киржикчилеринге номчуп таныштырган.